WAWEKEZAJI WAKARIBISHWA KUWEKEZA KATIKA VITUO VYA KUJAZA GESI

WAWEKEZAJI WAKARIBISHWA KUWEKEZA KATIKA VITUO VYA KUJAZA GESI 

Serikali ya Jamhuri ya Muungano wa Tanzania kupitia Wizara ya Nishati imewakaribisha wawekezaji kuwekeza katika vituo vya gesi hususani vijijini.

Naibu Waziri Mkuu na Waziri wa Nishati, Dkt. Doto Biteko, ametoa kauli hiyo Januari 24, 2025, jijini Dar es Salaam alipokutana na Balozi wa Uingereza nchini Tanzania, Marianne Young,

Dkt. Biteko amesema, Tanzania inakaribisha uwekezaji kutoka Uingereza kwa ajili ya ujenzi wa vituo vya kujaza gesi, hasa vijijini ili kuboresha upatikanaji wa gesi kwa matumizi ya kupikia kwa gharama nafuu na kwa wakati, hivyo kuchangia katika kuboresha maisha ya wananchi.

Dkt. Biteko ameainisha  hayo  katika mazungumzo yaliyolenga kuimarisha ushirikiano wa sekta ya nishati kati ya nchi hizo mbili. Amepongeza jitihada za Uingereza kusaidia juhudi za Tanzania katika kuboresha upatikanaji wa nishati safi kwa wananchi, hasa vijijini.

Kwa upande wake, Balozi Marianne Young ametoa pongezi kwa Tanzania kwa kuwa mwenyeji wa Mkutano wa Afrika wa Nishati na kutaja kwamba hii ni hatua muhimu inayothibitisha uongozi thabiti wa Rais Samia Suluhu Hassan katika kuhamasisha upatikanaji wa nishati safi barani Afrika. Ameongeza kuwa Uingereza itaendelea kuunga mkono jitihada za Tanzania, ikiwemo kuhakikisha upatikanaji wa nishati safi ya kupikia mashuleni na vijijini.

*#KAZIINAONGEA*