MAONO YA RAIS SAMIA YALETA MAENDELEO KWA NCHI NA WANANCHI

MAONO YA RAIS SAMIA YALETA MAENDELEO KWA NCHI NA WANANCHI

Barabara njia nne na sita kulistawisha jiji la Dodoma 

Serikali kupitia Wakala wa Barabara Tanzania (TANROADS), imepanga kupanua Barabara za kuingia na kutoka katikati ya jiji la Dodoma zenye jumla ya urefu wa kilometa 220 kwa kuzijenga kwa njia nne na sita kwa lengo la kuhakikisha jiji la Dodoma linaondokana na msongamano wa magari na kusaidia kuboresha huduma za usafiri na uchukuzi.

Haya ni maono ya Rais Samia katika kuhakikisha kuwa kupitia miradi mbalimbali ikiwemo uboreshai wa miundombinu, uchumi wa nchi na wananchi unastawi na kuleta matokeo maendeleo nchini. 

Mkurugenzi wa Mipango na Miundombinu wa TANROADS, Mhandisi Ephatar Mlavi wakati akizungumza na waandishi wa habari Februari 17, 2025 katika Ukumbi wa Idara ya Habari MAELEZO ameelezea Mafanikio ya Serikali ya Awamu ya Sita kwa kipindi cha Miaka minne inayoongozwa na Rais Dkt. Samia Suluhu Hassan.

Mhandisi Mlavi amezitaja barabara hizo kuwa ni Barabara ya Dodoma - Morogoro ambayo itakayojengwa (km 70), Dodoma - Arusha (km 50), Dodoma - Singida (km 50) na Dodoma - Iringa (km 50).

“Nia ni kuhakikisha barabara hizi zinaungana kwa urahisi na barabara ya mzunguko wa nje ya Dodoma ‘Dodoma Outer ring Roads’ na hivyo kulifanya jiji la Dodoma kuwa la mfano lisilo na msongamano wa magari na hivyo kuvutia shughuli za ukuaji wa uchumi”, amesema Mhandisi Mlavi.

Mhandisi Mlavi amefafanua kuwa upanuzi wa barabara hizo utatekelezwa kwa ufadhili wa Serikali kwa kushirikiana na Benki ya Dunia na utekelezaji wake utaanza na barabara zinazoingia na kutoka katika jiji la Dodoma kuelekea Chamwino (km 32), barabara ya Dodoma kuelekea Iringa- Mkonze (km 4.5) na barabara ya Dodoma kuelekea Arusha - Zamahero (km 8.5).

Aidha, Mlavi ameeleza kuwa hadi kufikia Februari, 2025 utekelezaji wa ujenzi wa barabara ya mzunguko (km 112.3) sehemu ya kwanza ya Nala – Veyula – Mtumba - Ihumwa Bandari Kavu (km 52.3) umefika asilimia 91 na sehemu ya Pili ya Ihumwa - Bandari Kavu – Matumbulu - Nala (km 62) umefika asilimia 85.

Mlavi ameongeza kuwa Serikali inaendelea na utekelezaji wa miradi mbalimbali ya kupunguza msongamano katika miji na majiji mengine ikiwemo mikoa ya Dar es Salaam, Mbeya, Arusha na Mwanza.

Kwa upande wake, Katibu Mkuu wa Wizara ya Habari, Utamaduni na Michezo na Msemaji Mkuu wa Serikali, Gerson Msigwa amewapongeza wahandisi wote wa TANROADS nchini kwa kuwa mstari wa mbele kuhakikisha miradi ya barabara, madaraja, na viwanja vya ndege inatekelezwa vizuri ili kuleta tija kwa Taifa.

*#KAZIINAONGEA*